दिल में सांढियलु जो मोहबत जो असरु
आहि वर्हियनि खां
सो असरु कंहिं खे ॾियां?
आग जा भड़िकी उथिया शोला
मगर
दिल न ॻरी
लोह मिसल
लाल लाल बणिजी पई
मां इहे रोशनियूं तपस्या जूं
हिन ‘सभ्य’ दुनिया में
कंहिं खे ॾियां?
केरु तूफ़ान मुंहिंजा ॻोलींदो
केरु पोलार खे परूड़ींदो
केरु कुव्वत ॾिसी सघे उन जी
केरु खिंवणियुनि जे क़हर खे जाचे
जज़्ब थींदियूं वञनि थियूं जे
दिल जे गुंबज़ ते
नौक जे अंदर;
केरु तस्वीर कढे आंसुनि जी
जिनि खे कंहिं रूप जे मिलण खां अॻु
ही बयाबान गर्म वारीअ जो
थो वठी जोर सां चूसे;
केरु कंहिं रात ॾे निहारींदो
सुबह जे आसरे फ़क़्त जंहिं में
कोई बस मुरिक मुंहं ते आणे किअं
रात जे ज़हर खे पीए वेठो!