रतो रतु थियल हथनि सां
जीअं जीअं मां
कंहिं ते वार थो करियां
हर बार मुंहिंजे बि हॾ मास जा टुकर
कपिजी दूर था किरनि
ॿियनि जे शख़्सी राज़नि खे
क़बर में दफ़न कन्दे कन्दे
विश्राम पाइण जी लालच में
मुंहिंजी बि के नन्ढा नन्ढा हिस्सा
वञी था ज़मीं दोज़ थियनि
मां बाक़ी केतिरो बचियलु आहियां
इहो मां मौत जे बिस्तरे ते सोचीन्दुसि
अजु ज़िंदगीअ आ ज़ख़म ढकण लाइ
मां महज़
पटियूं वेढ़ीन्दो थो रहां
पोइ बि ज़ख़म ॾिसण सां
हिकु नशो थो चढ़ेमि
मां घोड़े जी ॻोल्हा में
डोड़णथो लॻां
टेप थियल नारा
ख़ुमरी पाए बोदि में भरिजी
वॾ वाके वॼण था लॻनि
कंहिं ‘कामा’ सां ओचितो टकिराइजी
मां थाॿिड़जां थो
वहन्दड़ आमदरफ़्त में
नन्ढीअ ॿेटरीअ ते
को अकेलो बेहोश शख़्सु पियो आहे
मां तलवार खे
आमदरफ़्त में फिटो थो करियां
उहो बेहोश शख़्सु मां आहियां
मुंहिंजी तलवार किथे आहे?
(विछोटियूं- 1980)