राॻ पीलू
तर्ज़: खाकर क़सम वो कहते हैं किस सादगी के साथ।
दौलत जी पाक देवी आ किथि निशानु तुंहिंजो,
कंहिं शहर में नगर में सुहिणो मकानु तुंहिंजो,
कंहिंखे नसीब थियो आ अॼु कल्ह ही मानु तुंहिंजो,
भारत खे आहे देवी! हरदमु ध्यानु तुंहिंजो।
थींदी नसीब तुंहिंजी इश्रत कॾहिं असांखे!
मिलंदी ॿुधाइ तुंहिंजी राहत कॾहिं असांखे।
ऐ देवी! तोखे अॼु मूं हर बहर बर में ढूंढियो,
झंगल, पहाड़, वादी शम्सो - क़मर में ढूंढियो,
गंगा, कटास, जमुना, संतोकसर में ढूंढियो,
गोकुल, प्रयाग, मथुरा, काशी नगर में ढूंढियो।
तुंहिंजे तलब में हर सू मारियमि हज़ार चकर
लेकिन थियो न तुंहिंजो जलवो मंूखे मुयसर।
पूरो न थियो अञा छा लंडन जो सैर बाक़ी,
न्यूयार्क, मार्सेल्ज़, बर्लिन जो सैर बाक़ी,
पैरिस जे साफ रंगीन गुलशन जो सैर बाक़ी,
वाशिंगटन ऐं टोकियो, पीकिंग जो सैर बाक़ी,
देवी दुखनि आ घेरियो हिंदुस्तानु तुंहिंजो,
आहे सुञो ऐं सखिओ मुल्की मुकामु तंुहिंजो।
यूरोप में नेस्तीअ जो सामान थी रहियो आ,
बेकार हरिको देवी इंसानु थी रहियो आ,
आबाद शहर मिटजी वीरानु थी रहियो आ,
मैंचिस्टर सॼो ई सुन्सान थी रहियो आ,
अहिड़ी जॻह में तोखे धारण मां फाइदो छा,
रंजो अलम जे झूटनि खाइण मां फाइदो छा!
ऐ लक्ष्मी असां खां पूॼा बि नितु कराईं,
खीरनि में पाणु ॿोड़े ऐं तिलक थी लॻाईं,
थी ॾेव ॾेवरीअ जो पिणि चरन थी चुमाईं,
त बि घर कंगाल जे थी पेरो पटीअ न पाईं।
तुंहिंजी ॾिठी ‘दुखायल’ बिल्कुल अजीब चाली,
सोनो संदइ सिंघासन रहिजी वञे थो खाली।