धोरां री धरती
आ मनड़ो मोवणी, सुरंगी सोवणी
मीठा लागै इणरा बोल
कैर सांगरी फोफळियां री
बात अठै री न्यारी
काचर बोर मतीरा अर
राबड़ली सैंनै प्यारी
मोठ बाजरै री खीचड़ली
इमलाणै सूं सिणगारी
आथण बणावणी, हरख सूं खावणी
लागै टाबरियां नै कोड
धोरां री धरती ........
आगूणां डूंगर में मोरिया
मधरा-मधरा बोलै
आथूणां धोरां में कुरजां
मिसरी सी घौळे
काळा-पीळा बादळिया
मरूधर रो घूंघट खोलै
पायल छमकांवती, आ बिरखा आंवती
रिमझीम बाजैं ई रो पौड़
धोरां री धरती ........
ताती ताती लु चालै अर
काळी-पीळी आंधी
आग-उगळती गरमी आवै
काया पड़ज्यै मांदी
हार नी मानी कदैई मानखो
कड़क उन्याळै सामी
जेठ रो तावड़ो, लागै अणखावणो
जीवै दमां रै जोर
धोरां री धरती ........
राम रूसज्या कदैई अठै जद
बादळिया तरसावै
रीत्योड़ा कसवाड़
धरां रै ऊपर सूं लंघ ज्यावै
फेर काळ रा बाजै भचीड़ा
कांई समझ नीं आवै
सिसकता जीवड़ा, डांगर अर ढोरड़ा
फिरै भटकता ठौड़
धोरां री धरती ........
टप-टप टप-टप चोवै टापली
बिरखा जद आ ज्यावै
पो‘फाट्यां ई लोग लुगाई
खेत बीर हो ज्यावै
रूण-झुण, रूण-झुण टाली बजांता
बळदां नै ले ज्यावै
हरख अर चाव सूं, हळां री नोक सूं
लिखै धरा पर गीत
धोरां री धरती ........
मौज-मनाती अठै गोरियां
तीज-त्युंहार मनावै
होळी अर गणगौर फागणियै
गीत प्रीत रा गावै
सावणियो मन भावणियो
हिवड़ै हिचकोळ उठावै
प्रीत रै पालणै, सायब रै कारणै
जागै काळजियै री कोर
धोरां री धरती ........
मीठी अर हरखाऊ भासा
हियै नेह उपजावै
अणगिणती रा ग्रंथ लिखारा
ओ इतिहास बतावै
राज-मानता अजै मिली ना
कुण बांनै समझावै
लाखां-किरोड़ां री, भासा मन-भावणी
जोवै मानता री बाट
धोरां री धरती ........
गढ़ लूंठो चित्तौड़ जठै
घूम्यो राणा रो घोटो
मुगलां री अठै पगी ना लागी
नांव पड़ग्यो छोटो
रणबंका राठौड़ां रो
जोधाणै में नीं टोटो
बै दुरगादास सा, जलमियां सूरमा
बैरयां रो चाल्यो ना जोर
धोरां री धरती ........
मेवाड़ी तलवार अणूंती बार
धरा पर घूमी
राणा सांगा कुम्भा गौरा-बादळ इणनै चूमी
जुध में पाछै नहीं नारियां
आग धधकती लीनी
आण निभावण नै
लाज बचावण नै
पदमण कीन्यो जौ‘र
धोरां री धरती ........
नई नवेली बीनणी नै
ब्याय चूंडावत ल्यायो
मिल्या नैण सूं नैण
निरख हाड़ी राणी हरसायो
रात-रंग री बेळा में
बैरयां रणनाद बजायो
रणां में जाज्यो सा, जीत नै आज्यो सा
लेवो सेनाणी सीस
धोरां री धरती ........
नगरां री पटराणी जैपर
सैरै मन भावै
देसी-परदेसी सैलाणी
मौज मनावण आवै
जंतर-मंतर देख आंगळी
दांत तळै दबावै
गुलाबी रंगा रो,
बाग बगीचां रो
जैपर रो नीं तोड़
धोरां री धरती ........
गंग नै‘र नै ल्याय गंगासिंह
इणरो रूप संवारयो
राज कैनाळ रै पाणी सूं
धोरां पर सुरग उतारयो
चम्बळ-लूणी इण माटी नै
सदियां सूं सिणगारयो
बांध अर डैम सूं, पाणी रै जोर सूं
बिजळी चसै च्यारूं कूंट
धोरां री धरती ........
मिनख-मानवी सगळा टाबर
इण पर वारी जावां
बलिहारी धोरां री धरती
इणरो भाग जगावां
धोरां री धरती ........
रगत-पसीनो सींच-सींच
इण माटी नै महकावां
हियै रै हेत सूं, प्रेम री जोत सूं
दीपै आखी भौम,
धोरां री धरती ........