माक पन खे चुमी वरितो हो
ख़ुशबू खेसि वराए वेई हुई
बाग़ बि सुहिणा ऐं शान्त
केतिरनि किस्मनि जा बूटा
सन्हिड़ा सन्हिड़ा पन
नांग फणि जहिड़ा बि के के
गुल त हाणि ॾिसिजनि कोन
बाज़ार मां लंघन्दे
घणो कुझु ॾिसण ते दिल थीन्दी आहे
मां कुझु ख़रीद त कयां कोन
दवाउनि जे दुकान ते अची बिहन्दो आहियां
पाणु विकिणी वापस वरन्दो आहियां।
जिलेबियुनि वारे वटि
न न छॾि
फ्रूट जे लारीअ ते थोरो तरिसां
भाॼियूं त हूअ वठी ईन्दी आहे
अंगूर वठियो अचणु विसारियो छॾे
सूफ़ बि वॾा गोल गोल ॻाढ़ा ॻाढ़ा
जारीअ वारे त मथुनि
चिमकन्दड़ पनियूं बि लॻायूं आहिनि।
अघु त पुछी वठां
इन बहाने सूफ़ खे हथ में खणी
छुही बि वठन्दुसि।
कुल्हे ते कंहिं अची हथु रखियो
अञा हिति बीठो आहीं!
हलूं, देर थी आहे
ॿार घरि अची विया हून्दा।
मुंहिंजूं नज़रूं अञ बि लारीअ ते हुयूं
ॾाढियुनि सॿाझियुनि अखियुनि सां चयाईं
अजु तुंहिंजे पसंद जी भाॼी वरिती अथमि।