पसिनाको धारा बगाई / निमेष निखिल

पसिनाको धारा बगाई मिहिनेत गर्नुपर्छ
रगतमा डुबाएर बीजहरू छर्नुपर्छ
 
हाडमासु घोटिघोटी दुःख गर्ने गरिबले
एक छाक खान पनि अरूकै भर पर्नुपर्छ
 
रापी, गोडी, काटी, झाँटी मुखमा बाली आएपछि
हृदयमा ढुङ्गा राखी साहुको भाँडो भर्नुपर्छ
 
भाषणमात्र हैन अब काम गर्ने बेला आयो
दरिद्रले शोषणको महासागर तर्नुपर्छ
 
धरतीको छातीभरि जसले सुन फलाउँछ
बिडम्बना उसैले नै भोकै यहाँ मर्नुपर्छ