सॼी इनसान ज़ाति
हिक बीमार सभ्यता जी
औलाद आहे,
जंहिं
या त
नांगनि ऐं बलाउनि जी
पूॼा कई आहे
या पथर जे मूर्तुनि जी
या तुर्बतुनि जी
बाहियुनि ऐं दरियाहनि जी
या ‘विज़र्डस् ऐं विचिज़्’ जी
जादू जी,
फिलासाफरनि
पंहिंजे आला ॼाण जे
मुज़ाहरे करण लाइ
कएं नमूने जा ईश्वर ठाहिया
आत्माऊं ठाहियूं
अहिड़ीअ तरह
इनसानु हमेशा झुकन्दो ई रहियो
कंहिं ॿिए जे अॻियां
सन्दसि मनु
हिरास में रहियो
हू वहमनि ऐं संसनि जो
शिकारु थी वियो
हू आहे ‘आतम विरसो’
जेको असां खे सभ्यता
ॾिनो आहे!
इनसानु परेशान आहे
हू डप जे राकास खां
अञा पाण खे आजो
न करे सघियो आहे
डपु, डपु आहे
पोइ इहो
नांगनि ऐं बलाउनि खे
नाराज़ करण जो हुजे
या
ईश्वर खे!
साइंसदाननि
‘लैबारेटरियूं’ खोले
इएं समुझियो
त
कुदरत जे ॻुझनि में
हथु विझी
असां
इन मथां फ़तह पाइणु शुरू कई आहे;
इनसान जे मन में
वधीक छिक-ताण पैदा थी
हू
न हितां जो रहियो
न हुतां जो!
साइंस हुन खे दिमागु़ ॾिनो
दिमागु़ सोचीन्दो रहियो
पर
उहो थकिजी पियो-
कुझु हासिल न थियो
मन जी छिक-ताण
परेशानी ऐं पीड़ा
अॻे खां बि वधी वेयूं
इनसान जी हालत
बदतर थी वेई,
न वहम जो सहारो
न साइंस जो साथु
इनसानु
न हितां जो रहियो आहे
न हुतां जो!