हाथों मा सिद्धि हो कर्मो मा ऋद्धि ह्वो
मनखियत की पीड़ा नसों मा, ल्वे फर उमाळ ह्वो
नयुं सल-साज जोश तेरु ज्वान ह्वो।
झुकी जावो खैर-खरण्यां तेरी, सोंग-सुफल तेरु बाटु ह्वो।
मन मा सरस्वती कु वास अर वाणी मा हिलांस ह्वो
दुन्ये रीती,जग प्रीत ज्यु मा जगीं रैयी,
अंतस मा तेरा भगवान् ह्वो।
प्रचंड मन-मान, गात-बबड़ाट,
सक्या-पराण तों हाथ ह्वो।
राष्ट्र ध्वज-गीत ज्यान से ब्बी प्यारु हो,
इन स्व मान सम्मान तेरु स्वाभिमान हो
झुकी जावो खैर-खरण्यां तेरी, सोंग-सुफल तेरु बाटु ह्वो।
हर फजल नयीं उमंग तेरी
जीवन नयूँ गीतों कु तरंग-तान ह्वो
नव तौरण, लता-गता हाथ ल्हयेकि
धार-धार तू बिराजमान ह्वो
जलम भूमी सदानी स्वर्ग बणि रावो,
धरणी-धर तेरु बोल बचन सौं- करार ह्वो
बुग्यालों जन सुख-शांति छळकणु रे ललाट से तेरा,
माया तेरी निर्मल गंगा जनि छाळी हो
झुकी जावो खैर-खरण्यां तेरी, सोंग-सुफल तेरु बाटु ह्वो।
बीर छै तू भड़ छै माधो सिंग, गबरू कु नौ- निशाँण छै
देवथान हिमालय कु वासी तू,
गढ़कुमौं की आशाओं को नौ-नवाण छै
खडग उठो रणसिंगा गरजो,
थाती-माटी की लाज को तू तरणहार छै
त्वे घत्याणी बैरियों की ललकार
तोंका सामणी फ़ौलादी बण रोंण ह्वो
झुकी जावो खैर-खरण्यां तेरी, सोंग-सुफल तेरु बाटु ह्वो।
हर्ष ह्वो उल्लास ह्वो मनखियत तेरा धोर बटिन निराश न ह्वो
ग्लानि क्षोभ् आँखर तेरा किताब से समूल नाश ह्वो
इन दिवा जलो दगड्या ब्याखुनि जरा हैंसी जा
निर्बल बिचारी रात तें, तों गैणो का सारा न रोण पड़ो
अडिग करम परधान का ड़ाला रोप
मनखीयत् कु गीत कंठ भरी, भोंण मा अपणेस ल्यो
झुकी जावो खैर-खरण्यां तेरी, सोंग-सुफल तेरु बाटु ह्वो
मनखियत की पीड़ा नशों मा, ल्वे फर उमाळ ह्वो
झुकी जावो खैर-खरण्यां तेरी, सोंग सुफल तेरु बाटू ह्वो।