बम्बईअ जे दादर टेशन ते
बीठो हुउसि।
प्लैटफार्म ते
माण्हुनि जो महराणु हुओ!
छोलियुनि वांगुरु
माण्हू चुरिया पुरिया पिए!
इएं सोचे ई रहियो हुउसि
जो ‘फ़ास्ट’ ट्रेन का,
बिना बीहण जे
वेई वटाए।
गाॾीअ में का भीड़ हुई!
दरवाज़नि ते, दरियुनि मथां भी,
इएं मुसाफ़िर लटिकी रहिया हुआ
सरहा थी सूरीअ ते!
ॼणु माखीअ जे मानारे ते
चुहिटियूं हुयूं मखियूं सहसें!
ऐं माखी भी कहिड़ी माखी
थोरो जल्दी
घर पहुचण जे ख़्वाहिश जी,
पंहिंजी प्यारी घरवारीअ जी
मिठिड़ी मिठिड़ी मुर्क ॾिसण जे ख़्वाहिश जी
नंढिड़नि नंढिड़नि ॿारनि जे
ॿारनि जे
ॻिलिड़नि खे चुमण जे तमन्ना जी
आफ़ीस जे फ़ाईलुनि खां
की दूर भॼण जे तमन्ना जी
हिकिड़े पासे
तमन्ना जी माखी हुई,
ऐं ॿिए पासे
तलवार मौत जी
लटिकी रही हुई।