मुंहिंजो हिकु गीतु
मुंहिंजे हथनि मां निकिरी
अलाए केॾांहुं
उॾी वियो आहे
मां,
उन जी ॻोल्हा में आहियां
तो, को अहिड़ो गीतु ॾिठो आहे
जंहिं जे टहिकनि सां
ज़मीर ज़ख़मिजी वञनि
ऐं सन्नाटो छांइजी वञे
जंहिं जी मुर्क सां
अंदर जे चुहिंडिड़ियुनि जी चुभ
चपनि ते उभिरी
नकुली खिल जी सूरत अख़्तियार करे
जंहिं जी ख़ामोशी
कंहिं हौलनाक तूफ़ान जे
आमद जो उहिञाणु हुजे
ऐं लोक
पंहिंजनि चेहरनि जे दर दरियुनि खे
पुख़्ताईअ सां बंद करणु शुरू कनि
मुंहिंजे गीत खे छांवुनि में तलाश
हुन जी फितरत में नाहे
कहिड़ीअ बि छांव जो अहसासु खणणु
उस जी तपति में गामज़न हून्दो
(उस जो ऐशु भी हिकु अन्धो नशो आहे)
ही लहिस ऐं लिफुनि जे
दर्द जो आदी आहे
पंहिंजी नज़र में किरण खां पहिरीं
हीउ, ख़ुद ई
जुमलो जुमलो थी टुटी पवन्दो
लफ्जु जफ्जु थी विटुड़िजी वेन्दो
हुन जे अनेक हर्फ़नि मां
अनोखी सुगंधि उॾन्दी
अगर किथे कोई
आस पास न ॾिसीं
ऐं सुरहाणियुनि जा सॾ ॿुधीं त पक
इहो मंुहिंजो ई गीत हुन्दो।
मूंखे ज़रूर इतलाउ ॾिजि
मुंहिंजो हीउ गीतु
पेरनि जे लिफुनि जे रत सां
मंदर जे फ़र्श ते दाग़ कन्दो
मूरतीअ अॻियां दुआ नुमा भुणि भुणि में
खेस मंदर ॿाहिरां बीठल फ़क़ीरनि जो
अददु ॿुधाईन्दो
प्रसाद लाइ पूज़ारीअ ॾे
हथु न वधाईन्दो
ऐं हुन जी नफ़रत कमाईन्दो
उतां वरन्दो
तूं अहिड़े कंहिं पवित्र आस्तान ते
रत जादाग़ ॾिसीं
त मूंखे ॿुधाइजि
आर्डर-आर्डर
न्यायाधीश वारे मुतिरिके सां
इसाफ़ खपे
”एक-दो-तीन“ कन्दो
वॾे वाक ॾीन्दड़ खे
वाधायूं ॾीन्दो
ऐं इनसाफ़ जे देवीअ जे अखियुनि तां
कारी पटी लाहे
उन खे ताराज़ीअ जी काणि ॾेखारीन्दो
इहा इनसाफ़ जी ताराज़ी
ज़ोर सां हेठि मथे थीन्दी
को पलु
अदालत में सुस-पुस उभिरन्दी
को अहिड़ो मंज़र ॾिसीं
त
मूंखे तुर्तु नियापो मोकिलिजि
मुंहिंजो हीउ गीतु
मोरचनि में तन्हा नारनि जी बारिश में
सोच जी चादर वेढ़े
खिलन्दो हून्दो, रुअन्दो हून्दो
इहा पकी पछाण अथेई
मुंहिंजे हिन गीत जी
कंहिं अहिड़े पाॻल ते नज़र पवेई
त,
मूंखे, ज़रूर ख़बर ॾिजि।
रात जो ”रोशनी मार“ तारे खे
हेठि किरन्दो ॾिसी खुश थीन्दो
दरिया जे शीशे ॾे पथर उछिलाए
चंड खे टुकरा टुकरा करे
ॿुक भरे चांडाणि खे पीअन्दो
पर ॿीअ खिन खु़द सां ख़फे़ थी
ऊन्दाहीअ कुंड में,
थड़ थड़ कन्दो
विल्ह में वेही रहन्दो
अहिड़े शांत माहौल में
किथां चुर-पुर जो आवाज़ु ॿुधीं
त,
बिना देर मूंखे सॾण अचिजि
सुर ताल जे कै़द जी कोठिड़ीअ में
हीउ परिन्दो
कॾहिं आशियानों न अॾीन्दो
आर.जी तौर, रूपोश थियण लाइ
के घड़ियूं उते घारीन्दो
हीउ, आज़ादीअ जो शैदाई
आज़ादी पाए, आज़ादीअ खां
घॿिराइजी वेन्दो
ऐं असुल घर ॾांहुं मोट खाईन्दो
दिल में आस जॻाए
मुंहं ते मुर्क जो ॾीओ ॿारे,
अखियूं पाए वेठो आहियां
हीउ, मूं वटि वापस ईन्दो
किनि नवनि
अर्थनि सां नवनि अनुभवनि सां
नवनि सूरनि ऐं सुखनि सां
मां, हिनखे ॿीअ तरह जोड़ीन्दुसि
कुछु अहिड़ीअ तरह जोड़ीन्दुसि
जीअं हुन खे कोई
पहिरींअ सूरत सां
वाबस्ता करे न सघे।
(4,5,6,7, मनु मुड़े नथो 1995)