कत्ति ओढिबस्नु हौ यो जैबङ्लाको जडाउरी कोट !
गह्रौँ भारीजस्तो बसेको छ यो मेरो जीउमाथि युगौँदेखि
जबर्जस्ती ओढाइदिएको यो कोट ममाथि मैले माग्दै नमागी
फुकाउनै मुश्किल परिसक्यो नि यो जीउमै टाँस्सिएर ट्याप्पै
मेरो जीउबाट निस्कने माटोको मनपर्दो गन्ध जो छ नि
त्यसलाई पनि जितेर गह्नाउँछ कोट कुहेको माछा दङदङ
यसलाई फुकाउन खोज्दा मेरो कुम मर्केको छ ढाड सडकेको छ
तर अब खुर्केर ताछेर जसरी हुन्छ उप्काउनु नै छ यसलाई
बरू रूखको बोक्राले या त मलताको पत्ता गाँसेर जीउ ढाक्छु
अनि ऐलेसम्म गुम्सिबसेको मेरो जीउको गन्धलाई मुक्त गर्छु
(३ अगस्ट २००८)