भतिजा आज मैले के यस्तो सुन्नु प-यो कुरा
सुनेदेखि यहाँ छाती घोच्न थाल्यो तिखो छुरा ।
घरबार नयाँ अर्को जोड्न थाल्यौ अरे तिमी
यो देख्नुभन्दा पहिले किन फाट्तैन यो जिमी ।
म ठान्दथेँ तिमी धेरै ज्ञानी छौ बुद्धिमान् पनि
जानी जानी पाशभित्र पार्दैछौ किन जीवनी ।
दुई डुंगाभित्र खुट्टा हाली कोशी तरूँ भनी
थालेमा छुट्टिँदा डुंगा के होला भन ता अनि ।
ऋण छैन भनेदिखि जमानी भैदिने गर
झगडा छैन घरमा श्रीमती दुइटी भर ।
त्यस्ती लच्छिनकी राम्री बुहारी घरमा छँदै
अर्कीको लोभ के गर्छौ तिम्रो बुद्धि कहाँ छ खै ।
न यताका तिमी हुन्छौ न उताका हुने भयौ
हरे शिव तिमी व्यर्थ बदनाम हुने भयौ ।
पहिले गुन लाएथे भन्ने चाहिँ नसम्झनू
अहिलेको लागि बल्छी हालेथे यो नबिर्सनू ।
धुरी चढ्ने कुरा छाड तिम्रो हात्ती घरै छ नि
दुईको लठुवाभन्दा यौटीकै देउता धनी ।