युगौं पहिले
यसरीनै संझनाहरु
वस्तविकताहरु
ढुकढुकिहरु,
खुलदुलिहरु
यथार्थहरु
साँचो मनका प्रमाणहरु
लामो यात्रागरि
प्रेषककै ठेगानामा
जस्ताको तस्तै
फर्किएको त्यो क्षण
आज हुवहु दोहोरियो ।
फरक यति छ
उतिवेला पुगेर र्फकन
महिनौ लागेको थियो आज
पलभरमै फर्कियो ।
आशलाग्छ
सायद नमरुन्जेल लागि रहला,
लागि नै रहला
वल्ल वल्ल फेला पारेको
विगतको ठेगाना फेरिएथ्यो ।
थाहै नपाएरै एक युग वितेथ्यो ।
पटकौको प्रयाशले नयां ठेगाना
फेला पारेको
आज थाहा भयो
त्यो पनि फेरिएछ
छैन अव नयाँ ठेगाना
हुनसक्छ अवको यो युगभित्रै
इश्वरले भूतुक्कै माया गरेर
आफनो वनाउलान ।
विगत र वर्तमानमा भौतारिएको एउटा तृष्णा
तिमीलाई भुलाउननै
उनले औधी प्रेम गर्लान
प्रेमको भोकमा रनथनिएको
एउटा प्रेमी, त्यसको समुद्रमा
सम्मीलित हुने
पूर्ण संभावना छ ।