सूरज सो शैतान / मानसिंह राठौड़

सुरधरणी रो सूरमो,मरुधरा तणो मान ।
चमके देखो शान सूं,सूरज सो शैतान ।।1।।

भली भोम आ भारती ,जूझ्या कई जवान ।
हेक जूझयो जोरगो,सूरज सो शैतान ।।2।।

आभे चमके बीजळी,चंदो पण असमान ।
चमके चहुँ दिस आपणो,सूरज सो शैतान ।।3।।

 बाणासर रो बालक्यो,बणग्यो वीर जवान ।।
चटाई धूड़ चीन ने,सूरज सो शैतान ।।4।।

शत शत मार्या हेकले,पछ तजिया निज प्रान ।
अवनी ऊपर अमर है,सूरज सो शैतान ।।5।।

सीमा पर चौकस रियो,जब लग घट में प्रान ।
सरगां पूग्यो सूरमो,सूरज सो शैतान ।।6।।

लाज दूध री राखली,अर मायड़ रो मान ।
दीपै मरुधर देश में,सूरज सो शैतान ।।7।।