हम भारती / सुन्दर नौटियाल

 
हम भारती छ भारत का पुत्र हम -2
धन हे उत्तराखंड जख लिन्युं जनम -2

हम भारत कु भाल, ऊँचू मस्तक हिमाल -2
रोज चरण धोंदी गंगा, यखी यमुना जी कु छाल
यखी यमुना जी कु छाल ।
यत देवभुमि छ यख मनख्यात धरम ।
धन हे उत्तराखंड जख लिन्युं जनम -2

भेदभौ न मनख्यों बीच, धर्म-कर्म जाति पाति कु-2
हमथैं गर्व अपड़ी संस्कृति, बोली भाषा थाती कु
बोली भाषा थाती कु ।
हम बचैला अर बड़ौला खांदा कसम ।
धन हे उत्तराखंड जख लिन्युं जनम -2

यु देश हमारू मान, हमारी जान अभिमान -2
ये खातिर करी द्यौला, ज्यू जान कुर्बान ।
ज्यू जान कुर्बान ।
सौ-सौ बार मरीक बी यखि लेऊँ जनम ।
धन हे उत्तराखंड जख लिन्युं जनम -2