हूणियै रा होरठा (4) / हरीश भादानी

बटिया आलू प्याज रा
उड़ना तिरणा जाज
देखै चकरीबम्म
हवा खांवता हूणिया

खुरसी री चरभर रमै
खेवट पंगत जोड़
लोकराज री नाव
हवा भरोसे हूणिया

गूंगी खुरसी दावलै
सुरता बोली दीठ
बिना डोळ रो देख
मिनखाचारौ हूणिया

कळ पुरजा हाका करै
गोखै बयां हिसाब
फड़कै जद-जद होंठ
जडै़ किंवाड़ हूणिया

सोटयां खुभतां ही जगै
भाजै पहिया होय
फिरै थाकैलो लाद
थरकण नापै हूणिया

हाकम री हालै कलम
दिन रातींदो होय
लुळ-लुळ करै सलाम
रात तावड़ौ हूणिया

हाकम री आंख्या अजब
बांचै घोर अंधार
ताबड़ियै-सौ सांच
लगै फारसी हूणिया

छांट एक नांखै नहीं
बैठै मांडयां बूक
इंदर रा ए डाळ
देखै रेतड़ हूणिया