ઊતરજો એ હરિ! આશીર્વાદ:
મુરલીમાં વહજો અનહદ નાદ:
ઊતરજો એ હરિ! આશીર્વાદ.
વનવન શોધ્યાં, ગિરિવર શોધ્યા, શોધ્યા ક્ષિતિજના આરા;
શોધી શોધી સહુ જગતની ઝાડીઓ,
દીઠા ન બ્રહ્મકિનારા:
ઊતરજો એ હરિ! આશીર્વાદ.
સરોવર ભરિયાં, સાગર ભરિયાં, ભરિયાં આભ અનન્ત;
એક ખાલી અમ ઉરની કટોરી, હરિ!
ભરિયા ન ત્હેં તુજ સન્ત:
ઊતરજો એ હરિ! આશીર્વાદ.
રૂમતું - ઝૂમતું કિરણ રમે લઈ નિ:સીમના સન્દેશ;
રમજો એવી અમ આતમભાવના
તુજ હદ-બેહદને દેશ:
ઊતરજો એ હરિ! આશીર્વાદ.
મુરલીમાં વહજો અનહદ નાદ:
ઊતરજો એ હરિ! આશીર્વાદ.