भारत की संस्कृति के लिए... भाषा की उन्नति के लिए... साहित्य के प्रसार के लिए
ब्याव (5) / सत्यप्रकाश जोशी
Kavita Kosh से
आशिष पुरोहित (चर्चा | योगदान) द्वारा परिवर्तित 12:10, 14 दिसम्बर 2010 का अवतरण (नया पृष्ठ: {{KKGlobal}} {{KKRachna |रचनाकार=सत्यप्रकाश जोशी |संग्रह=राधा / सत्यप्रकाश जोशी…)
नई कांन्ह ! नईं
थारौ म्हारौ ब्याव कोनी हो सकै !
थारी म्हारी बात ई न्यारी,
म्हारै थारै प्रेम री जात ई न्यारी,
आपां एक दूजा सूं
अणजांण कठै ?
स्रिस्टी रै पै‘लै दिन सूं
एक दूजा नै ओळखां,
आपा रौ ब्याव कियां होवै ?
म्हारै आंगणियै लाखां नै
साई दै क्यूं बुलाऊं ?
क्यूं स्वयंवर रचाऊं ?
क्यूं हरण रौ सांग कराऊं ?
नारी रै माथै री मांग
पुरख रै बळ सूं क्यूं तोलूं ?
म्हारी प्रीत अबोली, म्हैं क्यूं बोलूं ?
