भारत की संस्कृति के लिए... भाषा की उन्नति के लिए... साहित्य के प्रसार के लिए
तूं कद आसी / गोरधनसिंह शेखावत
Kavita Kosh से
Kailash Pareek (चर्चा | योगदान) द्वारा परिवर्तित 20:14, 8 नवम्बर 2012 का अवतरण ('{{KKGlobal}} {{KKRachna |रचनाकार= गोरधनसिंह शेखावत | }} {{KKCatRajasthan}} <poem> त...' के साथ नया पन्ना बनाया)
तूं कद आसी
अलूणी बाहां सूं बंध्योड़ा
थारी गाढी प्रीत रा
रंगीला सपनां नै
ओळू आवण लागी
सावण सा मीठा होठां पर
थारी हेत री लगायोड़ी लाली री
रंग उतरबा लाग्यो
तूं कद आसी
गोखा रै सारै
थारा हाथ सूं लगायोड़ी
सुरजमुखी रै फूल आग्या
बाट जोवतां-जोवतां
म्हारो मन
सूखी फळी सो तिड़कण लाग्यो
तूं कद आसी
थारै बिना आ देह
बंजड़ धरती सी लागै
थारै बिना आ उमर
करज लियोड़ै धन सी लागै
थारै बिना अै गीत
जेठ री बळती लूवां सा लगै
तूं कद आसी
रोज थारै प्रीत रै देवरै माथै
रूप री प्याली
चोढ़तां-चोढ़ता
म्हारी देह सूखगी
हेत रै चूरमै री पिंडी
पड़ी-पड़ी सूखण लागी
तूं कद आसी
