भारत की संस्कृति के लिए... भाषा की उन्नति के लिए... साहित्य के प्रसार के लिए
હે કરુણાના કરનારા / અનામી
Kavita Kosh से
Amrut Valvi (चर्चा | योगदान) द्वारा परिवर्तित 17:41, 22 जुलाई 2013 का अवतरण ('{{KKGlobal}} {{KKRachna |रचनाकार= અનામી |अनुवादक= |संग्रह= }} {{KKCatKavita}} <poem>...' के साथ नया पन्ना बनाया)
હે કરુણાના કરનારા,
તારી કરુણાનો કોઈ પાર નથી.
હે સંકટના હરનારા,
તારી કરુણાનો કોઈ પાર નથી.
મેં પાપ કર્યા છે એવાં,
હું તો ભૂલ્યો તારી સેવા,
મારી ભૂલોને ભૂલનારા,
તારી કરુણાનો કોઈ પાર નથી.
હું અંતરમાં થઈ રાજી,
ખેલ્યો છું અવળી બાજી,
અવળી સવળી કરનારા,
તારી કરુણાનો કોઈ પાર નથી.
હે પરમ કૃપાળુ વ્હાલા,
મેં પીધા વિષના પ્યાલા,
વિષને અમૃત કરનારા,
તારી કરુણાનો કોઈ પાર નથી.
કદી છોરુ કછોરું થાયે,
પણ તું માવિતર કહેવાયે,
મીઠી છાયાના દેનારા,
તારી કરુણાનો કોઈ પાર નથી.
મને જડતો નથી કિનારો,
મારો ક્યાંથી આવે આરો,
મારી નાવના ખેવણહારા,
તારી કરુણાનો કોઈ પાર નથી.
છે જીવન મારું ઉદાસી,
તું શરણે લે અવિનાશી,
મારા દિલમાં હે રમનારા,
તારી કરુણાનો કોઈ પાર નથી.
