भारत की संस्कृति के लिए... भाषा की उन्नति के लिए... साहित्य के प्रसार के लिए
थारी आंख्यां सांम्ही / नन्द भारद्वाज
Kavita Kosh से
Neeraj Daiya (चर्चा | योगदान) द्वारा परिवर्तित 15:27, 5 मई 2014 का अवतरण ('{{KKGlobal}} {{KKRachna |रचनाकार=नंद भारद्वाज |संग्रह=अंधारपख / नं...' के साथ नया पन्ना बनाया)
कित्तौ बेबस
अर खाली हाथ व्हे जावूं
थारी उदास आंख्यां रै सांम्ही
आवतां ई म्हैं
आंख्यां -
जिकी सई सिंझ्या
गिरद चढियोड़ै आभै में ज्यूं
अणथाग सूनौपण लियां
पसरियोड़ी व्है कोसां लग
भावहीण
निस्चै ई नंीं भर सकूं
थारा बरत्योड़ा सबदां अर संकेतां सूं
आं सूकी तळायां मांय नुंवौ विस्वास
सुख-सांयत रौ नैहचौ
अर हीयै में हरख
हिबोळा खावतौ --
जांणै क्यूं
सुर तूट जावण पछै
अकारथ व्हे जावै
साज रा सगळा उतार-चढाव
कुण-सा संकेतां
अर सबदां-आखरां बूतै
समझावूं म्हारौ मकसद
जिकौ थारी
भुगत्योड़ी आखी ऊमर
अर अणभव रौ अरक पीयोड़ी
आंख्यां सांम्ही आवतां ई
व्हे जावै साव अबोलौ
अर पांगळौ -
अर इणी अरथ में
खोज है म्हारी कविता
वं नुंवां विस्वासू
स्बद-आखरां री,
जिका
थारी आंख्यां रै सांम्ही
ऊभ सकै !
अगस्त, ’73
