भारत की संस्कृति के लिए... भाषा की उन्नति के लिए... साहित्य के प्रसार के लिए
अँधेरिया तौ आँकै / हरिश्चंद्र पांडेय 'सरल'
Kavita Kosh से
Dr. ashok shukla (चर्चा | योगदान) द्वारा परिवर्तित 19:14, 27 जुलाई 2014 का अवतरण ('{{KKGlobal}} {{KKRachna |रचनाकार=हरिश्चंद्र पांडेय 'सरल' |अनुवादक= |...' के साथ नया पन्ना बनाया)
कबहुँ तौ किरन कौनिउ झोपड़ी मा झाँकै,
न कुछ अउर चाही अँधेरिया तौ आँकै।
बनै न घरैतिन बसै न परोसे
न सोचै कि दुनिया है वहिके भरोसे
तरस खाइ के हमकाँ कबहूँ न ताकै।
… … न कुछ अउर चाही अँधेरिया तौ आँकै।
करय झूठ वादा बरस बीत अनगिन
गरीबन काँ कबहूँ न पूछै यकौ छिन
न बिसुवास अब वहिके हाँ कै न ना कै।
… … न कुछ अउर चाही अँधेरिया तौ आँकै।
पलैं लाल झोपड़िउ मा गुदड़िउ मा रहि कै
अठारह महीना कै इतिहास कहि गै
यसस लाल तौ अपनी चुँदरी मा टाँकै।
… … न कुछ अउर चाही अँधेरिया तौ आँकै।
अमीरे गरीबे कै कस दुइ कहानी
बयार एक धरती गगन एक पानी
सरल एक रँग है धुआँ दोउ चिता कै।
… … न कुछ अउर चाही अँधेरिया तौ आँकै।
