पद 101 से 110 / कन्हैया लाल सेठिया
101.
सौरम धरती नाक पण
फोवो टांगै कान,
अंतर घालै आंतरो
मूरख बणै सुजाण !
102.
कठै पारखी कूंत दै
नर पींडी रो मोल ?
नारायण आं में फिरै
सोच समझ मुख खौल !
103.
भोगी रै मन भांवतो
रूड़ो पुसब गुलाब,
जोगी साधै कंवळ रो
पण निरलेप सभाव !
104.
गेला भाग्या उजाड़ में
गेला पूग्या गांव,
रूंखां उळझी तावड़ी
बणी मतै ही छांव !
105.
पुसब रूप धरती दियो
सूरज करयो सुरंग,
मै’क फैलसी पून रो
जे करसी सतसंग !
106.
तू मत समझी सूर उग
दियो अंधेरो मार,
चनेक आडो बन्द कर
फेर अंधेरो त्यार !
107.
मन रै घोड़ै पर चढयो
मजळ मान गिगनार,
रास छूटगी हाथ स्यूं
तू क्यां रो असवार ?
108.
डूंगर पसरयो कोस में
सिखर अणी रै मान,
छोड भीड़ रै मोह नै
जे बणणो भगवान !
109.
घड़ मूरत सेवै पछै
आप घड़ाईदार,
इयां भगत रो दास है
परतख सिरजणहार !
110.
सूग करै संसार स्यूं
बीं रै हियै विकार,
भासै निरमळ दीठ नै
ओ सत रो दरबार !
