भारत की संस्कृति के लिए... भाषा की उन्नति के लिए... साहित्य के प्रसार के लिए
काळ रो जाळ / कन्हैया लाल सेठिया
Kavita Kosh से
आशिष पुरोहित (चर्चा | योगदान) द्वारा परिवर्तित 07:31, 24 जनवरी 2015 का अवतरण ('{{KKGlobal}} {{KKRachna |रचनाकार=कन्हैया लाल सेठिया |अनुवादक= |संग...' के साथ नया पृष्ठ बनाया)
लागतां ही
चैत
चालै बळती,
खूंखावै आंध्यां,
झड़गी
खेजड़्या री
काची मींझर
गिरग्यो सांगर्यां रो
गरभ,
लुकग्या
भाज’र सरकनां में
रोहीड़ा रा रूड़ा फूल,
हुग्या
साव
नागाबूचा
फोगला’र कैर
बाणच रै नांव पर
ऊभी है
कोढ्यां री आंगळयां सी
घिनायोड़ी डंडाथोर,
चरगी रेवड़
जड़ समेत चूंटी
पड़्या है
माजनो पाड़्योड़ा सा
मूंडै बोलता खेत,
बंधगी गेलां में
ओकळयां
हुग्या आंतरै
नेड़ा बरस्योड़ा गांव
बिछावै
काळ
आप रो जाळ
हुसी कोजो हाल,
पण कोनी कीं उपाव
खासी मुरदार मांस
ओ ळिकतो जरख
हूण डाकण री असवारी !
