भारत की संस्कृति के लिए... भाषा की उन्नति के लिए... साहित्य के प्रसार के लिए
ओ बगत-खंख रो / वासु आचार्य
Kavita Kosh से
आशिष पुरोहित (चर्चा | योगदान) द्वारा परिवर्तित 16:45, 26 फ़रवरी 2015 का अवतरण ('{{KKGlobal}} {{KKRachna |रचनाकार=वासु आचार्य |संग्रह=सूको ताळ / वास...' के साथ नया पृष्ठ बनाया)
ओ बगत
लूंआ लपटा अर खंख रो है
खंख री बीड़ मांय
औजू ताई पूरो है अकास
कांप रैयौ-आभै खानी सूं
नीं बरसण रो
धरती रो बिस्वास
च्यारूमैर-उमस परसीणौ
बळत रूं रूं
आखी जियां जूण सीजती
कैड़ी घड़ी उदास
मिन्दर री धजा हुयगी है
थपैड़ा सूं लीर लीर
मांय बिराज्यां भैंरूनाथ
न्हांय रैया है
रंजी रल्यौड़ै
तेल सिन्दूर रै बैवतै
रैलां मांय
बौला बौला
टस सूं मस नहीं हुवता
पसवाड़ै कुटिया रै मांय
बैठौ बाबौ करै है जाप
बिरखा सारू
आस्था
अर बिस्वास री आँख्यां
कदै‘ई ताकै
बाबै रै हाथ री
गौमुखी
अर कदै‘ई खंख भर्यौ आभो
म्हैं सोचू
मानसून रै जुवै रा पासा
किया कर सकैला
आपरै पख मांय
गौमुखी री माळा
अर म्हैं भी ताकू
खंख भर्यौ आभो
लीर लीर मिन्दर री धजा
अर टस सूं मस
नीं हुवती मूरत
