भारत की संस्कृति के लिए... भाषा की उन्नति के लिए... साहित्य के प्रसार के लिए
साचली कविता / मोहन सोनी ‘चक्र’
Kavita Kosh से
Neeraj Daiya (चर्चा | योगदान) द्वारा परिवर्तित 18:39, 22 जनवरी 2016 का अवतरण ('{{KKGlobal}} {{KKRachna |रचनाकार=मोहन सोनी ‘चक्र’ |संग्रह= मंडाण / न...' के साथ नया पृष्ठ बनाया)
म्हैं कियां मांड सकूं
सांचली कविता
मजूरां खातर
जद कै मिलै मोकळा रिपिया म्हनैं
फगत बोलणै-बतळावणै रा।
म्हैं कियां उकेर सकूं
मनचायो चितराम
भूख रो
जद कै म्हैं
जीम सकूं मनचायो भोजन।
म्हैं कियां मैसूस कर सकूं
पीड़ जुलम री
जद कै म्हनैं हरमेस
मिलतो आयो
बगत सारू सांतरो मोको
खुद री बात कैवण रो।
म्हैं कियां समझ सकूं
आफळ वीं करसै री
जको कदै सूकै
अर कदै ओळां रै बिचाळै
हाथ मसळतो रैय जावै
जद कै म्हैं
दरस-ई नीं कर्या
आज तांणी किणी खेत रा।
अर म्हैं कियां
इण आखै दरसावां रो
मोस’र मिणियो सबदां सूं
मांड सकूं छेवट
एक साचली कविता।
