भारत की संस्कृति के लिए... भाषा की उन्नति के लिए... साहित्य के प्रसार के लिए
पिया बसै परदेश / संवेदना / राहुल शिवाय
Kavita Kosh से
Rahul Shivay (चर्चा | योगदान) द्वारा परिवर्तित 23:59, 12 मई 2016 का अवतरण ('{{KKGlobal}} {{KKRachna |रचनाकार=राहुल शिवाय |अनुवादक= |संग्रह=संव...' के साथ नया पृष्ठ बनाया)
माघ के छै धुकधुकिया रौदा
पिया बसै परदेश,
धूप सेकी केॅ याद मेॅ ननदी
बाँधै छी हम केश |
ई ठंडी के रात मे हुनका
आबै नै की याद ?
मन पागल होय जाय छै हमरोॅ
करै ललि संवाद |
कागा भी नै आबै छै
लेकेॅ कोनो संदेश,
माघ के छै धुकधुकिया रौदा
पिया बसै परदेश |
हमरा सेॅ की भूल भेलै जे
भूली गेले हुनी प्रीत,
कहोॅ अकेले गैयै केना
ई वसंत के गीत |
हमरा तेॅ बस इहे बात के
मन मेॅ ननदी ठेस,
माघ के छै धुकधुकिया रौदा
पिया बसै परदेश |
रचनाकाल - 14 जनवरी 2011
