बानी परेका ती आँखा / सुमन पोखरेल

बानी परेका ती आँखा तिम्रा अझै पनि झुक्न खोज्छन्
कामना तिम्रा खुल्न चाहेर अझै किन लुक्न खोज्छन्

झुम्का हल्लेको मात खाए जस्तो
चुरा मिलेर गीत गाए जस्तो
बुझ्दैछु सबै आग्रहलाई, आज ती पनि दुख्न खोज्छन्
बानी परेका ती आँखा तर अझै पनि झुक्न खोज्छन्

कामेका तिम्रा ती अधरहरू
सङ्कोची मनका ती रहरहरू
बुझ्दैछु म लाजहरूलाई, आज ती सबै फुक्न खोज्छन्
बानी परेका ती आँखा तर अझै पनि झुक्न खोज्छन्