भारत की संस्कृति के लिए... भाषा की उन्नति के लिए... साहित्य के प्रसार के लिए
फेरि अर्को आइतवार / चन्द्र घिमिरे
Kavita Kosh से
Sirjanbindu (चर्चा | योगदान) द्वारा परिवर्तित 11:06, 12 मई 2017 का अवतरण ('{{KKGlobal}} {{KKRachna |रचनाकार=चन्द्र घिमिरे |अनुवादक= |संग्रह= }}...' के साथ नया पृष्ठ बनाया)
सुदूर पूर्वको क्यासिनो रात स्थगन गरेर
लावारिस सालका पातहरू
बज्ने सल्र्याङ–सल्र्याङ
सन्त्रास बजाउँदै
आयो अर्को आइतवार ।
बज्यो
सुर्ताको सुर्ती मल्दै
मलेशियामै हात छुटेको
रघुवीरको खुइयऽऽऽ तन ।
बज्यो
अरबबाट घर फिर्दा
मालिकबाट
अरबी छोरो आर्जेकी
छब्बिस वर्षे धनकुमारी
र उनको जोगी मन ।
बज्यो
यत्तिनै खेर
चियापसले रामदुलारीको कितली हुँदै
सर्लाहीबाट
अइयाऽऽऽ समाचारको फुस्सऽऽऽ बाफ
‘अपहरित रामस्वरूपको फिरौतीपछि हत्या’
नथामेर त्यो ‘ओभरडोज’
दुर्घटनाग्रस्त चिया गिलासहरू
भिखमपुरमा चुडियो धु्रवेश दाको सितार
बच्चे साह तेली बसाइँ हिँड्ने
लू चल्छ ।
बग्दो नदीको पइँया अररियो
सहनै पर्ने भो
फेरि अर्को लोधर आइतबार
भोग्नै पर्ने भो
फेरि अर्को गद्दार आइतबार !
