ढरर ढम्म ढरर ढम्म
ढ्वाङ् ठोक सारा !
आज जानुपर्छ नानी
देशनिंति प्यारा !
लेऊ हात हात लाठी
लाम लाग सारा ।
मार्न जाऊ देश शत्रु
पोख्न रगत धारा ।।
पात पीं पीं लौ बजाऊ
छरन अबीर लावा ।
वान् टु वान टु कदम चाल
गर्न हिंड्न धाबा ।।
आज जानुपर्छ हामी
देश-निंति सारा ।
ढरर ढम्म ढरर ढम्म
ढ्वाङ ठोक सारा ।।
तालिमी छ आजलाई
छन् लडाइँ हाम्रा ।
बन्नुपर्छ है सिपाही
हृदय स्थिर र चाम्रा ।।
मर्नुमै छ स्वर्ग हेर !
जिउनु कीर्ति खाली
झनन झन्न झनन झन्न
बाज काँस थाली ।।
मुटु र ज्यान आज हाली
हुकुम एक पाली ।
ढरर ढम्म ढरर ढम्म
हिंड्न कदम चाली ।।
छोड्नुपर्छ घर र बार
देश-निंति सारा ।
यो हुरी पछाडि हामी
बन्नुपर्छ तारा ।।
प्रभु छ माथि हृदय साथी
मर्छ को र प्यारा !
देश-निंति मर्नु जिउनु
गुम्नु मेट्नु प्यारा ।
पीठ नदिनू बढ्नू बढ्नू
चढ्नू कठिन किल्ला ।
यो धूवाँ र आँधिपछि
कीर्ति मधुर खुल्ला ।।
मान्यलाई मान कीर्ति
हेर अबीर लावा ।
जो डराई बन्छ श्याल
काँप्छ खाइ हावा ।।
छोड्नुपर्छ घर र बार
बिर्स सकल प्यारा ।
कस र छाती ताँति ताँति
हाँसी चलन सारा ।।
मट्टीको छ यो शरीर
उड्छ बन्छ हावा ।
देश-निंति चंकिनेछ
गर्छ जो त धावा ।।
वीरजाति ताँति ताँति
भाँति भाँति लाम ।
लड्न चाल कदम कदम
लाम यो नथाम ।।
नजर अघि छ आज हेर
वीर हृदय तारा ।
ढरर ढम्म ढरर ढम्म
बढन आज प्यारा ।।
आज तिर्न ऋण र गाँस्न
वीर हृदय माला ।
शस्त्र हात सफल जात
जल्नुपर्छ ज्वाला ।।
जाग काली ! जाग जाग
झलल झलल पारी ।
देश-निंति शस्त्र अस्त्र
छौ न शत्रु पारी ।।
पीं पीं पीं पीं पात पात
लाम चाल चाल ।
कालसरि आउनेछ
शत्रु पंक्ति छाल ।।
जिन्दगी छ यो लडाइँ
नेत्र झल्ल बल्ला ।
जीउ धुलो भएर जान्छ
खालि आत्मा फुल्ला ।।
आज हेर सब नेपाली
आगो लौ निकाल ।
मार शत्रु पार ध्वंस
चुली चढ्न थाल ।।
होश राख कदम कदम
नाम यो नफाल ।
वीर वीर धीर धीर
बनन सकल तारा ।।
आज देश-निंति जानु -
पर्छ दूर प्यारा ।
ढरर ढम्म ढरर ढम्म
ढ्वाङ् ठोक सारा !