हमरा कही केॅ गेलै, नै ऐलै पीया !
सौनोॅ बीतलै, भादोॅ बीतलै,
पूस आरो माघोॅ के जाड़ोॅ बीतलै,
बीती गेलै यहेॅ रं ठहाका इंजोरिया !
पुरबा बहै छै, देहोॅ दुखाय छै !
पछिया ने पपरी ठोरोॅ पेॅ ओछाय छै,
जिय तरसाय गेलै कारी बदरिया !
मेघ अखारी घिरि-घिरि आबै,
तोरोॅ संदेशा पिया, हमरा सुनाबै,
ठनका सें डोॅर लागै, लपकै बिजुरिया !
सुरुजें भियानी असरा बन्हाबै,
निठुरा दुपहरियाँ जियरा जराबै,
भेलाँ निराश ताकी सँझकी डहरिया !
हमरा कही केॅ गेलै, नै ऐलै पीया !