देसूंटो-10 / नीरज दइया
थूं रैवै-
सगळां मांय
अर राखै
सगळां नैं ई
खुद मांय
अणंत-अपार सिरजण
थारो है सांवरा
पखेरूं खातर
पींजरो हुवै
आभै रो देसूंटो
इण री ठाह हुवै
पण ठाह नीं हुवै
डील पिंजरो कोनी
जेळ है
जिण मांय नीं दीसै
आभो आतमा नैं
आतमा री ओळूं में रैवै-
आभो
म्हारी काया रै देस मांय
आतमा काटै
देसूंटो
देस मांय
ठाह मांय
ठाह नीं पड़ै
कै कांईं हुवै-
कोई देस
इण देस सूं
बीं देस री जातरा
आ जूण करै
फगत इतरी जातरा
रूप सूं अरूप
दीठ सूं अदीठ
देही सूं
छेकड़ हुवणो है
अेक दिन
अदेही
इण ही ठाह हुवै
पण ठाह नीं हुवै
देस मांय
ठाह नीं पड़ै
कै कांई हुवै-
कोई देस
देस नैं
थूं गूंथ्यो
म्हारी सांस-सांस मांय
सांस रै पार
थूं राखै-
कोई अदीठ देस
थूं बसै जठै
बो है थारो देस
बो है म्हारो देस
बगत रै बस्तै
कोनी कोई पोथी
पोथी जिसी पोथी
जिण सूं की आगूंच
म्हैं जाण सकूं
इण री ठाह हुवै
पण ठाह नीं हुवै
मा कैवै-
अखूंटो है
थारो देस
जाणै ओ देस
अेक खूंटो है
अर म्हैं हूं-
थारी गाय सांवरा
देसूंटै पछै
पड़ै ठाह देस री
कै कांई हुवै-
कोई देस
ओ- देस, बो- देस
अै- खूंट, बै-खूंट
थूं ई बता
कै थूं कठै है सांवरा ?
थूं कठै है सांवरा ??
सुपनां मांय है
का सांसां मांय है
नींद मांय है
का जाग मांय है
सबदां मांय है
का अरथां मांय है
थूं कठै है सांवरा ?
देसूंटै पछै ई
सात समदरां पार
काळै कोसां
किणी देसांतर मांथै
थूं म्हनै मिलजै सांवरा !
थूं म्हनै मिलजै सांवरा !!
००००
