भारत की संस्कृति के लिए... भाषा की उन्नति के लिए... साहित्य के प्रसार के लिए
ओ प्रेम / सिया चौधरी
Kavita Kosh से
आशिष पुरोहित (चर्चा | योगदान) द्वारा परिवर्तित 14:16, 27 जून 2017 का अवतरण ('{{KKGlobal}} {{KKRachna |रचनाकार=सिया चौधरी |अनुवादक= |संग्रह=थार-स...' के साथ नया पृष्ठ बनाया)
थूं मत सोचजै रामूड़ा
कै ओ प्रेम
लूवां बाजती
दोपारी में मिलै
जकी छिंयां है...।
अरे बावळा
ओ तो
इस्यो तपतो तावड़ो है
कै पग मेलतां
फाला उपड़ जावै...।
आ भी मत सोची
कै ओ प्रेम
दिनूगै आळो
दई-छाछ रो
कळेवो है जिणनै
थूं गटागट गिट जावै।
ओ तो बो जैर है
जकै नै थूं
नीं गिट सकै
अर नीं सोरै सांस
थूकण में ई आवै...।
थूं आ तो नीं सोचै
ऐ रूपलै प्रेम रा
मारग सुगम-सोरा है
अरे गेला, सुजाण
आं में तो बै कांटा है
जिण में अळूझ‘र मन रा
किरचा-किरचा खिंड जावै...।
