भारत की संस्कृति के लिए... भाषा की उन्नति के लिए... साहित्य के प्रसार के लिए
हवेली / मधु आचार्य 'आशावादी'
Kavita Kosh से
आशिष पुरोहित (चर्चा | योगदान) द्वारा परिवर्तित 15:57, 28 जून 2017 का अवतरण ('{{KKGlobal}} {{KKRachna |रचनाकार=मधु आचार्य 'आशावादी' |अनुवादक= |संग...' के साथ नया पृष्ठ बनाया)
गांव री
बा हवेली
दूर -दूर तांई
उण रो नांव
लोग देखण सारू आवता
उण री कला माथै
आपरी भणाई सूं
केई तरां री
बातां बतावता
उणनै सांतरी
अर
अेकली हवेली कैवता
केई घंटा खड़ा होय ‘र
उणनै टुकर -टुकर जोवता
जूनै जुग री बातां रा
किस्सा सुणावता
पण
आ रमक -झमक
खाली बारै सूं आयोड़ै
लोगां रै कारणै ही
बै जावता
तो हवेली मांय
सरणाटो कूकतो
अर बा हवेली
हवेली नीं लाग
लागण लागती
खाली भाठां रो ढिगलो।
