मन लाग्छ / हरिभक्त कटुवाल

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

हरिभक्त कटुवाल » यो जिन्दगी खै के जिन्दगी »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

कहिले-काही -
रक्सी पिई लट्ठ परेको मानसि देख्दा
म पनि ऊ सरि लट्ठ परेर
हिँडू-हिँडूँझैँ लाग्छ,
त्यस जीवनको मोहले होइन
स्व-जीवनको अस्तित्व बिर्सन
लट्ठ हुन मन लाग्छ ।

कहिले-काही -
सहर बीचको चौबाटामा
हात घुमाई लत्तो छोडी
नाचिरहेको पागल देख्दा
म पनि ऊ सरि लत्तो छोडी
नाचूँ-नाचूँझैँ लाग्छ,
पागलपनको मोहले होइन
पृथिवीको अस्तित्व बिर्सन
लत्तो छोड्न मन लाग्छ ।

कहिले-काही -
हुन्छ जब-जब गुञ्जायमान
मानिसहरुको हल्ली-खल्लीले
वेश्यालयको साँगुरो गल्ली,
म पनि रातको आड लिएर
पुगूँ-पुगूँझैँ लाग्छ,
काममा तृप्त गराउन होइन
सभ्यताको अस्तित्व बिर्सन
पुगिहेर्न मन लाग्छ ।