मगहिया ही हम / उमेश बहादुरपुरी

मगहिया ही हम मगही बोलबे करम।
काहे के लाज भइया काहे के शरम।।
सुनबइ मगही बोलबइ मगही।
पढ़बइ मगही लिखबइ मगही।
इहे ईमान हमर ईहे धरम।। मगहिया ....
हमरा मान चाही स्वाभिमान चाही।
खाली मगधे न´् सउँसे हिंदुस्तान चाही।
तोड़ देबइ हम एक दिन सबके भरम।। मगहिया ....
मनेर के लड्डू सिलाव के खाजा।
चोंदी के लाय आव गाजा।
सतधरवा के पानी हे गरमागरम मगहिया ....
सजल रहे बजार सदा रहे बहार।
ई बगिया में सदा कोयल करे पुकार।
मगहिये बन जीयम मगहिये ले मरम।। मगहिया .....