भारत की संस्कृति के लिए... भाषा की उन्नति के लिए... साहित्य के प्रसार के लिए
एक आमा के दू गोही / पीसी लाल यादव
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 22:51, 26 अगस्त 2019 का अवतरण ('{{KKGlobal}} {{KKRachna |रचनाकार=पीसी लाल यादव |अनुवादक= |संग्रह=मै...' के साथ नया पृष्ठ बनाया)
एक आमा के दू गोही? कखरो के हे ले का होही?
जेन होही तेन होही, संसो झन कर तें जोही।
कोनो ल देखाबे एक अंगरी
त अपन डहर हे तीन अंगरी।
अनभल करइया के भल कहाँ
झन इचे कोनो कखरो टंगरी॥
हरू कभू गरू नई होय, पानी म नई बूड़े फोही।
एक आमा के दू गोही? कखरो के हे ले का होही?
पर बर जेन हर खांचा खनय
तेन ह सऊँहै एक दिन झपाय।
दूसर के हुरमत बेचइया ह
मान-गऊन कभू नई पाय॥
लुही ओसनेच ओहा संगी, जेन ह जइसन बोही।
एक आमा के दू गोही? कखरो केहे ले का होही?
बरछी-भाला के घाव भरे
फेर बोली के घाव हरियर।
दूध म जतके पानी डारबे-
दूध होही ओतके पनियर।
करे बानी म करेजा चानी, सोवत-जागत पदोही।
एक आमा के दू गोही? कखरो केहे ले का होही॥
