उणां दिनां री ओळ्यूं
आवतां ही अचाणचक
बापर ज्यावै कंठा तांइ
अबोली सी सूनाण,
अर हो ज्यावै अदीठ
सगळा आखर,
ठीक बियां ही जियां
बापरीजै सुनियाड
दिन ढल्या पाछे
गांव री उतरादी सीम में
औ म्हारा सोनहार!
जै सुण ज्यावै थारै
होंठा रै कुंपळा सू्ं
निकळतो एक हेलो,
तो स्यात बिखर ज्यावै
औ सूनाण ठीक बियां ही
जियां थळी मांय फिरते
नासेटू रै कंठा में पड़े
दीवड़ी रौ एक घूंट अर
हो ज्यावै कंठ निर्मळ।
घणौ'इ बखत कट ग्यौ
इण आमण-दूमणी सूनाण में
देख अब रूंख भी हरया हुग्या।
अब आ मिळ भी लेवां गांव
आळी तळाई माथे जठै आखै
गांव रा सगळा शक माफ़ हूया करै!