भारत की संस्कृति के लिए... भाषा की उन्नति के लिए... साहित्य के प्रसार के लिए
साच / इरशाद अज़ीज़
Kavita Kosh से
आशिष पुरोहित (चर्चा | योगदान) द्वारा परिवर्तित 17:22, 15 जून 2020 का अवतरण ('{{KKGlobal}} {{KKRachna |रचनाकार= इरशाद अज़ीज़ |अनुवादक= |संग्रह= मन...' के साथ नया पृष्ठ बनाया)
थारै ओळूं रै समंदर मांय
हिचकोळा खावती
म्हारी जूण री नाव
उण बगत सूं आफळ करै
जद थूं म्हारै हुवण रै साच नैं
तोड़गी ही
अर छोड़गी ही
आपां रै दोयां रै बिचाळै
अेक सरणाटो
जको समदर सूं गैरो
अर अथाग है
अर म्हैं अंवेर राखी है
उण टूट्योड़ै काच री किरच्यां
जिणरै हरेक किरचै मांय
आपां दोयां रो साच दीसै
थूं नीं ठाह कठै गमगी
अर म्हैं जोवूं थारी बाट
नीं ठाह कद आसी थूं
आपरो साच लियां
पार लगावण थारा
म्हारै अर थारै हुवण रो।
जाणूं हूं औ मारग
सीधो नीं है
अबखायां भरयोड़ो औ मारग
घणो लांबो नीं है
पण है अबखो-अंवळो
कित्ता जुगां सूं थारी उडीक
बावळी हुयगी
लोग कैवै - थूं नीं आवै
पण म्हैं कैवूं - थूं आसी।
