भारत की संस्कृति के लिए... भाषा की उन्नति के लिए... साहित्य के प्रसार के लिए
धरती के तारणहार / कुमार संभव
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 00:12, 26 मार्च 2021 का अवतरण ('{{KKGlobal}} {{KKRachna |रचनाकार=कुमार संभव |अनुवादक= |संग्रह=ऋतुव...' के साथ नया पृष्ठ बनाया)
सखी ई बैशाखोॅ में भी पिया हमरोॅ,
खेत जोतै लेॅ गेलोॅ छै बहियार।
भोरे उठी पिया बूट ओसैलकै
बोढ़ी-सोढ़ी केॅ भूसोॅ उठैलकै,
फेरू हल के पालोॅ में जलखै बान्ही
धड़फड़ करनें बैलोॅ केॅ टिटकारनें,
गेलोॅ छै जोतै लेॅ खेत-पथार।
तोहें नै आवियो धानी हमरा कहलकै
लू लगी जैथों कहि केॅ समझैलकै,
कलौआ घरोॅ में आवी केॅ हम्में खैवै
दूपहरिया बैलो साथें घरें में बितैबै,
सखी, प्रेम के महिमा अपरमपार।
रौदिये में आवी पिया, दौरी करलकै
साँझ होतै पिया बैलोॅ के खिलैलकै,
कहाँ फुर्सत हुनी तनियो टा पैलकै
रात छाती लगाय आपनोॅ धरम निभैलकै,
किसान रूप में लागै हुनी, धरती के तारणहार।
