आज त्यसैले नुनिलो धारा
आपस आपस जीवन सुम्पी
हर्ष मनाई हात समाई
औँठी साटी प्रेम लगाई
उस दिन लायौं दुइले माला
आज त्यसैले नुनिलो धारा ।
मुसुमुसु हाँसी लाज पचाई
दर्शकलाई उत्सुक पारी
नजर जुधायौं पहिलो बाजी
झटपट छल्दै सबको आँखा
आज त्यसैले नुनिलो धारा ।
स्वप्न खुलेझैँ भेट गरेर
जोडेथ्यौं यो विरही नाता
क्या छ अचम्म विधिको चाला
वास दुवैको टाढा टाढा
आज त्यसैले नुनिलो धारा ।
................
ज्वाला, २००६