भारत की संस्कृति के लिए... भाषा की उन्नति के लिए... साहित्य के प्रसार के लिए
भेटूँ म कुनै दिन त्यसरी / सानु शर्मा
Kavita Kosh से
Sirjanbindu (चर्चा | योगदान) द्वारा परिवर्तित 18:19, 9 जुलाई 2024 का अवतरण ('{{KKGlobal}} {{KKRachna |रचनाकार=सानु शर्मा |अनुवादक= |संग्रह= }} {{KKCatKa...' के साथ नया पृष्ठ बनाया)
कुनै दिन यसरी भेटूँ म तिमीलाई
न बिदा हुने हतार होस्
न कसैले बिथोल्ला भन्ने अत्यार होस्
कुरा सकियोस् र
मनको अन्तरकुन्तर रित्तियोस्
भन्न छुटेको सम्झेर
न मन पछुताओस्
न कुनै बाडुली आओस् ।
नथाकूँ म बोलेर
नअघाऊँ तिमीलाई सुनेर
समयको कुनै सीमा नहोस्
र एकै ठाउँ बाँधिइरहौँ
तिमी, समय र म ।
बाधूँ अँगालोमा र निदाऊँ निर्धक्क
न बिउँझने हतार होस्
न केही बित्ने चटारो होस्
तिम्रो अँगालामा पग्लिऊँ र
मिसियूँ तिमीमा यसरी
जसरी आत्मा मिसिन्छ परमात्मामा ।
केवल यस्तो अतृप्त सपना नदेखूँ
तृप्त गरिदिने विपना होस् ।
त्यसरी भेटूँ म कुनै दिन
तिमीलाई ।
