भारत की संस्कृति के लिए... भाषा की उन्नति के लिए... साहित्य के प्रसार के लिए
गाछी के कतार / अंजनी कुमार शर्मा
Kavita Kosh से
सड़कोॅ के दोनों बाजु
गाछी के कतार,
लगै छै जेना
सड़कें करनें दै शृंगार।
देखी केॅ हरियाली
मिटै छै लोगोॅ के थकान
जेना पावी गेलोॅ रहेॅ
घरोॅ के दलान।
चिड़ियां सिनी जेरा के जेरा
डालने रहै छै गाछी पेॅ डेरा,
सुनावै छै मिट्ठोॅ-मिट्ठोॅ गीत;
लगै जेना बटोही के छकै मीत।
रौद सें गाछी दै छै राहत।
जाड़ा हुवेॅ या गरमी
पर्यटकोॅ के करै छै स्वागत।
इ गाछ-बिरीछपुर-बस्ती के कनियान के
माँगोॅ के सिन्दूर,
देखथैं, मन श्रद्धा सें अवनत
क्रुर भाव सब दूर!
