डिॼिणो / कृश्न खटवाणी
कौरवनि ऐं पांडवनि जे युद्ध में,
हिकु डिॼिणो हो।
हू कॾहिं पांडवनि,
कॾहिं कौरवनि जे
गिरोह में थे शामिल थियो
सिर्फ़ इन लाइ त
संदसि सिरु सलामत रहे।
जंगि जे मैदान ते पिणि
हू तरफ़ बदिलाईन्दो रहियो,
पंहिंजे बचाव लाइ
कुंडूं ॻोल्हीन्दो रहियो,
सिपाहियुनि जे पुठियां,
पाणु लिकाईन्दो रहियो।
तूतारो वॻो
पहिरियों तीरु
हवा में उॾियो।
उहो तीरु
उन डरपोक खे लॻो
जो घॿराहट में
सामुहूं अची वियो।
सदियुनि खां मढु पियो आहे
जंगि जे मैदान ते।
कएं जोधा लंघिया आहिनि
उन मथां-
लामारा ॾीन्दड़ सिरिणियूं
खाई न सघन्दियूं आहिनि,
उन मढ़ खे जो पथर जियां सख़्तु आहे।
रोलू जानवर
वेझो ईन्दे
भॼी वेन्दा आहिनि दूर
उन जी बदबूइ न सहारे।
सुनसान भूमीअ ते
डिॼिणे जो बदनु पियो आहे,
बरसात जूं बूंदूं छिणकंदियूं आहिनि
सिज जा किरिणा खूरे जियां तपन्दा आहिनि,
उन्हनि खां अणॼाणु
उहो मढु सदियुनि खां
वीरान भूमीअ ते पियो आहे।
(हिक डिघी सांति- 30.6.86)
