भारत की संस्कृति के लिए... भाषा की उन्नति के लिए... साहित्य के प्रसार के लिए
पठालीछों कूड़ु / मोहित नेगी मुंतज़िर
Kavita Kosh से
सेरी भो भयात रे
बाब दादूँ थात रे
सेरा गों मा धाक रे
भुलयूं बिसरयूँ बटवे
जख रात बिरात रे।
चुलु नि बजदू छो रात भर
वे पठालीछों कूड़ा पर।
गौं मा क्वी बरात हो
के दयबते जात हो
गौं मा केका पितरों
सप्ताह श्राद्ध हो।
सदानि व्हे सब्यूँ बसर
वे पठालीछों कूड़ा पर।
जेका चौक झुमैला व्हेन
के धियानियों डोला गेन
के मनखयूं याद रेन
नंदा राजजात मा
देवतों छंतोला भिंटेंन
केकु जस नी करि असर।
वे पठालीछों कूड़ा पर।
काका बोड़ा सोरा भारा
सबुन बोली हिस्सा करा
एथर क्वी राड न हो
खत्म येकु किस्सा कर्रा
सब्यूँन गाडी दिनी कसर
वे पठालीछों कूड़ा पर।
सब्यूँ प्यार प्रेम हारी
न केन सोची न बिचारि
दे दादूँ वजूद पर
बड़ान पेलु घोंण मारी
कुजाणी केकी लगी नज़र
वे पठालीछों कूड़ा पर।
