बेइमानी / रमेश क्षितिज

भाग्यलाई दोष दिऊँ कि आफैँलाई गाली गरूँ
तिमी पनि उस्तै रै’छौ जस्तो भेटे अरूअरू

देउता भन्छन् आफूलाई सबै ढुङ्गाहरू
कहाँ पोखूँ आफ्नो आस्था कसको भर परूँ
साथीहरू थुप्रै भेटेँ भेटिएनन् साथहरू
तिमी पनि उस्तै रैछौ जस्तो भेटेँ अरूअरू

सबै भन्थे बेग्लै छु म अरूभन्दा फरक बन्छु
सबै मलाई टेकी जान्छन् म त सडक बन्छु
सोचेँ तिम्रो हात समाई जिन्दगीका भेल तरूँ
तिमी पनि उस्तै रैछौ जस्तो भेटेँ अरूअरू