भॻति / प्रेम प्रकाश
कंहिं हिक शाम जो विहन्दासीं
देर रात ताईं पिअंदासीं
पोएं पहर मिली असीं
हिक भॻति विझन्दासीं!
असांजो चोग़ो लीडूं, लीडूं़ हून्दो
बोछणु कमर बजाइ सिर ते ॿधलु हून्दो
थकल पेरनि में घुंघरु ॿधन्दासीं
साणु दज़ियल साज़ हून्दा
रियाज़ विसारे हथ खणन्दासीं
स्वास असां जा बूसाटियल हून्दा
खुलियल कारे आसमान हेठि
मिटीअ जी हिक दिकी हून्दी
सामुहूं मैलनि ताईं पखिड़ियल
रेत ई रेत हून्दी
क़ौम जो बुधन्दड़ु अवाम कोन हून्दो
मख़मली बिस्तरनि अन्दर उहो
सुपनाई आलम में हून्दो
पंहिंजे आवाज़ खे दूर ताईं खणी वेन्दड़
हवा शान्त हून्दी
उहे बार बार असां ॾांहं मोटी ईन्दा।
तूं मुंहिंजे बुण बुनियाद खां ॻाल्हि खणिजि
मां तुंहिंजे माज़ी हाल जो बयानु
विच विच में वठाराईन्दुसि...
पोएं पहर मिली असीं
हिक भॻति विझन्दासीं
कंहिं हिक शाम ज़रूर विहन्दासीं...
देर रात ताईं पिअन्दासीं।
भॻति जे पहिरिएं चरण में
हिकु चहचिटो उभारीन्दासीं
मां हली, तूं वटि अची किरी मरन्दुसि
तूं मरी करे ईन्दें ऐं हलन्दो रहन्दें
नचन्दो रहन्दें।
ॿिन्ही जे सरीर मां
हिक हिक चीज़ ॿाहिर निकिरन्दी
तुंहिंजी आत्मा हून्दी
मुंहिंजो विवेकु हून्दो
तुंहिंजी आत्मा कंहिं सरसब्ज़ फ़र्द जो
रोल अदा कन्दी
ऐं मुंहिंजो विवेकु ग़रीबु
मुंहिंजो ई रहन्दो।
ॿई पाण में कुझु ॻाल्हाईन्दा रहन्दा
मुंहिंजो विवेकु विच में हिकु मोनोलाग चवन्दो:
ॿियो सभु मूंखां पुछिजि,
मुंहिंजो नालो न पुछिजि
मुंहिंजी सुञाणप न पुछिजि
मुंहिंजो घरु न पुछिजि
मुंहिंजो पाड़ो न पुछिजि
मुंहिंजो मुल्कु न पुछिजि
पर सोन जे प्यालीअ में भरे तोखे
मां शराबु पियारे सघन्दुसि!
ॿियो सभु मूंखां पुछिजि
मुंहिंजी दरयाफ़्त न कजि
मुंहिंजा पेर न ॻोल्हिजि
मुंहिंजा हथ न ॻोल्हिजि
मुंहिंजू अखियूं न ॻोल्हिजि
मुंहिंजा कन, नक, छुहाव न तलाश कजि
मां जॾहिं होश में आयुसि
ॻणणु शुरू कयुमि
बेहोश थियण बाद बि ॻणिया पियो!
ॿियो सभु मुंहिंजो ॾिसिजि
मुंहिंजो अन्दरु न ॾिसिजि
मुंहिंजो अहसासु न ॾिसिजि
मुंहिंजो वीचारु न ॾिसिजि
मुंहिंजो विश्वासु न ॾिसिजि
मुंहिंजा क़दुर न ॾिसिजि
मुंहिंजो आतमु न ॾिसिजि
न मां तोसां ॻाल्हाए थो सघां
न मां पाण सां ॻाल्हाए रहियो आहियां
डिॾिकी खाई खाई
हिकु ई शब्दु अणचिटो उचारे रहियो आहियां
जंहिं जो अर्थु हरू भरू डुखियो कोन्हे
पर इहा ई मुंहिंजी
संस्कृतिक हासिलात आहे!
मां हलां थो
पड़ाॾो चवे थो पेर कोन्हनि
मां उॾामी सघां थो
पड़ाहो खिले थो, पर किथे आहिनि?
मां छुहन्दो आहियां
पड़ाॾो स्वासु छॾे थो, हथ कोन्हनि
मां ॾिसन्दो आहियां
पड़ाॾो स्वासु खणे थो, अखियूं बन्द आहिनि
मां ॻाल्हाईन्दो आहियां
पड़ाॾो पीड़ा इज़हारे थो, शब्द कोन्हनि
मां खिलां थो
पड़ाॾो मोट ॾिए थो, सुॾिको
मां चिल्लायां थो
सिंधू माथिरीअ जो रहवासी मां
अजु कीअं समुंड पार वञी
निकितो आहियां
मूं वक़्तु ॾिठो आहे
पड़ाॾो डुखु ज़ाहिर करे थो
तो क़ीमती खां क़ीमती वाच बदिली आहे
लॾपलाणि बाद तो
वक़्तु कॾहिं कोन ॾिठो आहे
मां रड़ि करियां थो ‘बचाउ’
पड़ाॾे में विनाश गूंजे थो
हिक लम्बी शान्त बाद
मां वापस भुण भुण में मोटां थो
तूं मूंखां ॿियो सभु कुझु पुछिजि
मुंहिंजी संस्कृतीअ लाइ न पुछिजि
मुंहिंजे इतिहास लाइ न पुछिजि
मुंहिंजे लोक परम्पराउनि लाइ न पुछिजि
मुंहिंजी जीवन शैलीअ लाइ न पुछिजि
कंहिं हिक शाम ज़रूर विहन्दासीं
देर रात ताईं पियन्दासीं
पोएं पहर मिली असीं
हिक भॻति विझन्दासीं।
भॻति जे पोएं चरण में
असीं याद में खणन्दाससीं बात
ॾुखनि जे पाण मुरादो वहन्दड़ सिलसिले खे
रोकीन्दासीं।
याद ऐं डुख जा कलाम
मौत जा ई के साया आहिनि
इन्हनि जो तूं आरोह न छेड़िजि
मुंहिंजे अवरोह में ख़राश आहे।
तूं लूणियाठी वारीअ मंझां
हिकु तहज़ीबी कोटु अॾिजि
जंहिं जे भितियुनि ते उकिरण लाइ मां
भाउरनि खां
संदनि नालो ऐं नाणो आणे सघन्दुसि!
तूं ॾिसिजि
मुंहिंजे चमिड़ीअ खां गरमु वारी अन्दर वेन्दी
तुंहिंजे ख़ून खे थधी वारी पी वेन्दी
तूं मुंहिंजे लाश जे सेरांधीअ खां
शइरु चइजि
मां तुंहिंजे लाश जे पेरांधीअ खां
कविता चवन्दुसि
तूं अवाम खे मुंहिंजी आखि़री दक दक
जो अहवालु ॾिजि
मां तुंहिंजे फाटल अखियुनि जी
तशबीह बुधाईन्दुसि
तुंहिंजो कफ़न वेदना हून्दो
मुंहिंजो कफ़न रेत...
कंहिं हिक शाम जो विहन्दासीं
देर रात ताईं पिअंदासीं
पोंएं पहर मिली असीं
हिक भॻति विझन्दासीं!
(भॻति मजमूओ-1998)
