भारत की संस्कृति के लिए... भाषा की उन्नति के लिए... साहित्य के प्रसार के लिए
मँह मँह मँहके ले फुलवरिया / मोती बी.ए.
Kavita Kosh से
मँह मँह मँहके ले फुलवरिया
बनठल चललू कहाँ गुजरिया
रुनझुन बाजेले पायेलिया
चम चम चमकेले टिकुलिया
गोरिया तरसे ला जियरा हमार।
सर सर सरके मोरि चुनरिया
झिरमिर झिरमिर बहति बेयरिया
अँखिया कजरा लगाऊँ
लिलरा टिकुली सटाऊँ
छैला छाँड़ि द डगरिया हमार।
पुरुवा डोले रस के मातल
महुवा गइल मदाय
टेर बँसुरिया बँसवा झूमे
अमवो गइल बउराय
कोइलरि डारि डारि गावे
पपिहा पिउ पिउ बोलावे
रतियाँ लागे ना पलकिया हमार।
बलमा मोरा बाँका छैला
डोले नैन हिडोले
अंग अंग मोरे चुवे मदन रस
दुनिया बोली बोले
सुनि के जीउ जरि जाला
तनिको सहि नाहीं जाला
लोगवा बैरी भइल बा हमार।
एइसन सुन्नरि बाडू गोरी
मनवा गइल मोहाय
सब केहू चाहत बाटे हमके
गरवा लेंई लगाय
एइमें केहू के न दोष
हमके तोहरे भरोस
गोरिया तोहरे से असरा हमार
छैला तूँही ए जवानी के सिंगार।
मँह मँह मँहके ले...
