शहीदी चमत्कार / हूँदराज दुखायल
वसाईंदें अञा बरसात खूनी आसमां केसीं?
गुलामीअ में अड़े सय्याद रहंदा बेजुबां केसी?
बहारीअ खां अञा रहंदो बोस्तां केसीं?
कहरु तुंहिंजो वसी केसीं कंदो बर्बाद भारत खे?
भलाई करि, भलो थींदुइ, न करि नाशाद भारत खे।
वसाए आतिशी शोला उजाड़ियो तो चमनु मंुहिंजो,
छिपाए माहे आज़ादी, कयुइ ऊंदह सहनु मुंहिंजो,
ॾेई वाॻूं शिकारियुनि खे कयो बंद तो दहनु मुंहिंजो,
इन्हीअ फितने अंगेज़ीअ सां कंदें शायद कफ़न मुंहिंजो।
ॾिनो भारत, जनमु अहिड़नि महायोधनि सरीरनि खे
भुलाईंदी न हीअ दुनिया कॾहिं जिनि सूरवीरनि खे।
जॾहिं शेरनि जे माता जो ग़जबु, कातिल! बपा थींदो,
तॾहिं रखु याद, हर इंसानु ॾदें आङुरियूं ॾींदो,
जॾहिं शींहणि जो चम्बो दुश्मननि जी जान चीरींदो,
तॾहिं ही खून ऐ ज़ालिम! अजबु लालाणि लाईंदो।
जॾहिं अफ़लाक ते तूफ़ान जी तलवार नाज़िल थी,
तॾहिं वेदा इशारे ते मिड़ई काफूर बादल थी।
जॾहिं भारत जे शेरनि जी फ़िज़ा में गर्जना थींदी,
सदा ‘जय जय’ हज़ारनि हासिदनि जी जान चीरींदी,
जॾहिं आज़ादी देवी शौक सां भारत अंदरि ईंदी,
‘‘दुखायल’’, देस जा, माता मिड़ेई दर्द मेटींदी।
जवाननि में इहो उत्साह ऐं सौदाउ पैदा थिए,
फक़ति आज़ादगीअ वारो भलेरो भाव पैदा थिए।
