भारत की संस्कृति के लिए... भाषा की उन्नति के लिए... साहित्य के प्रसार के लिए
सपना सब नीलाम भेलै / धीरेन्द्र छतहारवाला
Kavita Kosh से
प्राण-पीर छितरैलै जबसें, सपना सब नीलाम भेलै
बेकारो जोड़ी केॅ नाम तोरोॅ, गीत हमरोॅ बदनाम भेलै ।
कबेॅ चाहलियै केकरोॅ मन केॅ
अपने मन केॅ बांधी राखलियै
भावोॅ के अनुपम थाथी केॅ
चिट्ठी में बस लीखी देलियै
जबेॅ-तबेॅ तोरा भूलै लेॅ
हम्मीं ही किरिया खैलियै
निर्झर बनलै आँखी में लोर, यत्न सभे नाकाम भेलै
बेकारो जोड़ी केॅ नाम तोरोॅ, गीत हमरोॅ बदनाम भेलै ।
तोरोॅ प्यार के दर्द सें जानौं
युगोॅ-युगोॅ सें नाता छै
कालकूट पीवी केॅ तैहियो
झुकलोॅ हमरोॅ माथा छै
जब-जब जुड़लै दर्द के महफिल
हमरोॅ-तोरोॅ जिकिर भेलै
दर्द बनी केेॅ काँटोॅ-सुइया
चुभी-चुभी तखनी गेलै
दुक्खे टा जिनगी में मिललोॅ, बस सुक्खोॅ के जे नाम भेलै
बेकार जोड़ी केॅ नाम तोरोॅ, गीत हमरोॅ बदनाम भेलै ।
